Özbəkistanın Qaşqadərya vilayətində Azərbaycanla birgə qızıl layihəsi

Özbəkistan Qaşqadərya vilayətində Azərbaycanla birgə qızıl hasilatı layihəsi həyata keçirir. Day.Az xəbər verir ki, məlumatı Özbəkistan Prezidentinin mətbuat xidməti yayıb. Bu açıqlama oktyabrın 21-də Prezident Şavkat Mirziyoyevin regiona səfəri zamanı verilib. Layihənin Kitab rayonunda həyata keçirilməsi planlaşdırılır.

Şəhrisəbz rayonunda Rusiya investorları 300 milyon dollar dəyərində turizm kompleksi inşa etməyi planlaşdırırlar. Kompleksə kanat yolu, hotel və xizək kurortu daxil olacaq. Mirziyoyev son beş ildə vilayətə 20 trilyon som (təxminən 1,6 milyard dollar) investisiya yönəldildiyini, cəlb olunmuş xarici investisiyanın 7 milyard dollara çatdığını bildirib.

Mirziyoyev məhsulların vilayətin özündə dərindən emal edilməsinin və region sakinlərinin layiqli gəlir əldə etməsinin zəruri olduğunu qeyd edib. O, 2027-ci ili müasir sənaye və aqrotexnologiyalar əsasında Qaşqadəryanın inkişaf ili elan edib. Prezident daha sonra simvolik düyməni basaraq əlavə obyektlərin tikintisinə start verib.