Dünyanın ən qədim gəmi batığı Antalyada tapıldı

Antalyanın Kekova adası yaxınlığında dünyanın ən qədim batığına aid təxminən 4 min 700 illik amfora tapılıb. Türkiyə Mədəniyyət və Turizm naziri Mehmet Nuri Ersoy Kekovada aparılan su altı qazıntıları ilə bağlı NSosyal hesabında paylaşım edib.

Ersoy qazıntılarda çıxarılan amforaların Anadolu sahillərinin dəniz ticarətindəki köklü keçmişinə işıq saldığını bildirib. Zeytun yağı və ya şərab daşımaq üçün istifadə edildiyi düşünülən bu qabların Şərqi Aralıq dənizindəki ticarət əlaqələrinin izlərini daşıdığını qeyd edib. Gil analizlərinin amforaların çox güman ki, İordan vadisindəki emalatxanalarda istehsal olunduğuna işarə etdiyi bildirilib. Oxşar nümunələrin Misirdə, Troyada və Kritdə də tapıldığı qeyd olunub.

Tapıntılar arasında üzərində 9 fərqli işarə və gövdəsində 2 deşik olan bir amfora da diqqət çəkir. Pendir və ya kərə yağı hazırlanmasında yayıq kimi istifadə edilmiş ola biləcəyi düşünülən bu qabın, dənizçilərin uzun səyahətlərdə öz qidalarını istehsal etmiş ola biləcəklərinə dair ipucları verdiyi bildirilir. Ersoy qazıntıların elmi məsuliyyətini üzərinə götürən Doç. Dr. Hakan Öniz'i və əməyi olanları təbrik edib.