Erhürman: Xristodulidis rotasiyalı prezidentliyi şərtsiz qəbul etsə, dərhal masaya gələrəm

Şimali Kipr Türk Respublikasının Prezidenti Tufan Erhürman Kipr məsələsində son mərhələni dəyərləndirərək, Rum lideri Nikos Xristodulidisin mövqeyini tənqid edib. BMT Baş katibi Antonio Quterreşin irəli sürdüyü yeddi etimad yaradıcı tədbir üzrə gözlənilən irəliləyişin əldə edilmədiyini bildirən Erhürman, formal görüşlərə qarşı olduğunu vurğulayıb.

Erhürman Xristodulidisin yeddi maddəni kənara qoyaraq 19 yeni təkliflə masaya gəldiyini deyib. Onun sözlərinə görə, Rum tərəfinin təklifləri yazılı deyil, şifahi çatdırılıb. Yeni təkliflərin müzakirəsinə qarşı olmadığını, lakin prioritetin yeddi maddə üzrə konkret irəliləyiş olduğunu əlavə edən Erhürman, Rum tərəfinin bu məsələdə lazımi iradə göstərmədiyini söyləyib.

Erhürman New York-da üçlü görüşün keçirilməməsinin səbəblərini izah edərək, rotasiyalı prezidentliyi prinsipial olaraq və başqa məsələlərdən asılı olmadan qəbul edən Rum tərəfi ilə dərhal görüşə qoşulacağını BMT-nin Şəxsi nümayəndəsi Maria Anxela Holginə bildirdiyini deyib. Lakin bu təklifə də müsbət cavab almadığını bildirib.