Nazir: "Hədəfimiz 4 QVt ötürmə gücünə malik layihəni yekun investisiya qərarına çatdırmaqdır"

Bakıda "Xəzər-Qara dəniz-Avropa Yaşıl Enerji Dəhlizi" layihəsinin investisiya və tərəfdaşlıq imkanlarına həsr olunmuş "Yaşıl Enerji Dəhlizi: Texniki-iqtisadi əsaslandırmadan icraya doğru" Forumu keçirilib. Energetika Nazirliyinə istinadən verilən məlumata görə, forum layihənin investisiya və praktiki icra mərhələsinə keçidini sürətləndirmək, biznes modelini, maliyyələşdirmə strukturunu və kommersiya perspektivlərini tərəfdaşlarla müzakirə etmək məqsədi daşıyır. Tədbirdə Dünya Bankı, EIB, EBRD, ADB və çoxsaylı beynəlxalq şirkətlər təmsil olunub.

Enerji naziri Pərviz Şahbazov açılışda layihənin regional enerji təhlükəsizliyi, təchizatın şaxələndirilməsi və yaşıl keçid baxımından strateji əhəmiyyətini vurğulayıb. Nazir bildirib ki, 2022-ci ildə Buxarestdə imzalanmış Sazişlə əsası qoyulan layihənin cari ilin iyulunda başa çatmış tədqiqatı onun texniki cəhətdən həyata keçirilə biləcəyini təsdiqləyib. Ötürmə gücünün 4 QVt-a çatdırılması və təxminən 3 min kilometr uzunluğunda dəhlizin 2032-ci ildən mərhələli şəkildə istismara verilməsi nəzərdə tutulur.

Nazirin sözlərinə görə, məqsəd dəhlizi aydın biznes modelinə və dayanıqlı maliyyə strukturuna malik regional layihəyə çevirərək 2029-cu ildə yekun investisiya qərarına çatdırmaqdır. Layihənin 2040-cı ildən Avropaya ildə təxminən 20 milyard kilovat-saat elektrik ötürməsi və karbon emissiyalarının 3,6 milyon tonadək azaldılması gözlənilir. Nazir bu hədəfi "X" sosial şəbəkəsindəki hesabında da bildirib.