Zəngəzur dəhlizi ilə sərnişin daşımalarının şərtləri açıqlandı

Ermənistanın xarici işlər naziri Ararat Mirzoyan TRIPP marşrutu çərçivəsində Ermənistandan keçəcək dəmir yolu xəttində sərnişin daşımalarının həyata keçiriləcəyini açıqlayıb. Modern.az-a açıqlamasında Milli Məclisin İqtisadi siyasət, sənaye və sahibkarlıq komitəsinin sədr müavini Azər Badamov TRIPP marşrutunun gələcəkdə regionlararası sərnişin daşımalarında mühüm rol oynaya biləcəyini bildirib.

Badamov sərnişin daşımalarının reallaşmasının siyasi və praktiki şərtlərdən asılı olduğunu vurğulayıb. Onun sözlərinə görə, ilk növbədə Ermənistanla Azərbaycan arasında münasibətlərin normallaşması, nəqliyyat kommunikasiyalarının açılması və qarşılıqlı etimadın formalaşması vacibdir. O, uzun illər münaqişə şəraitində yaşamış iki xalq arasında sərnişin əlaqələrinin dərhal genişlənməsinin real görünmədiyini, lakin mərhələli əməkdaşlığın mümkün olduğunu qeyd edib.

Deputat həmçinin Azərbaycanın əsas ərazisi ilə Naxçıvan arasında maneəsiz nəqliyyat əlaqəsinin yaradılmasının xüsusi əhəmiyyət daşıdığını bildirib.