Könül Nurullayeva: Ermənistan sülh müqaviləsi istiqamətində real addımlar atmalıdır

Azərbaycan Milli Məclisinin deputatı Könül Nurullayeva Ermənistanın yekun sülh müqaviləsinin imzalanması istiqamətində konkret addımlar atmalı olduğunu bildirib. O, Modern.az-a açıqlamasında 2025-ci il avqustun 8-də Vaşinqtonda əldə olunan razılaşmaların davamlı sülh üçün diplomatik zəmin yaratdığını, lakin ciddi maneələrin qaldığını deyib.

Deputatın sözlərinə görə, 2026-cı ilin iyununda Ermənistanda keçirilən parlament seçkilərindən, yeni hökumətin formalaşdırılmasından və 2026–2031-ci illəri əhatə edən Hökumət Proqramının qəbulundan sonra da gözlənilən irəliləyiş olmayıb. Azərbaycanın tranzit məhdudiyyətlərini aradan qaldırdığını vurğulayan Nurullayeva, Ermənistanın öhdəliklərin icrasını ləngitdiyini bildirib. Onun sözlərinə görə, ən ciddi problemlərdən biri Konstitusiya məsələsidir, çünki İrəvan yeni Konstitusiya layihəsini hələ də ictimaiyyətə təqdim etməyib.

Nurullayeva həmçinin TRİPP layihəsinin ləngiməsini, sərhədlərin delimitasiyasını və anklav və eksklavlarla bağlı qeyri-müəyyənlikləri sülh prosesinin perspektivinə təsir edən amillər kimi göstərib. Ədliyyə naziri Srbuhi Qalyan yeni Konstitusiya layihəsinin 2026-cı ilin sonunadək təqdim olunmasının gözləndiyini, xarici işlər naziri Ararat Mirzoyan isə TRİPP üzrə tikinti işlərinin 2026-cı ilin sonunda və ya 2027-ci ilin əvvəlində başlaya biləcəyini bildirib.