Siemens Energy Yaşıl Enerji Dəhlizi layihəsi üzrə texnoloji dəstəyi araşdırır

Siemens Energy Xəzər–Qara dəniz–Avropa Yaşıl Enerji Dəhlizi layihəsi çərçivəsində yüksək gərginlikli birbaşa cərəyan (HVDC) texnologiyasına əsaslanan çevirici yarımstansiyalar üçün həllər təqdim etmək imkanlarını araşdırır. Şirkətin Türkiyə, Mərkəzi Asiya və Qərbi Avropa üzrə vitse-prezidenti Maksim Zubov bu barədə Azərbaycan Energetika Nazirliyinin sosial media hesablarında yayımlanan videoda açıqlayıb. O, “Yaşıl Enerji Dəhlizi: Əsaslandırılmış tədqiqatdan həyata keçirilməyə” forumuna dair fikirlərini bölüşüb.

Zubovun sözlərinə görə, şirkət Avropadakı müştəri və tərəfdaşlar şəbəkəsindən istifadə edərək potensial elektrik alıcıları ilə əlaqə yaradılmasına kömək etməyə hazırdır. O, layihənin bərpa olunan enerji mənbələrinin inkişafını dəstəklədiyini, Avropanın enerji təchizatını şaxələndirdiyini və Azərbaycanın elektrik şəbəkəsini gücləndirə biləcəyini bildirib.

Bakıda keçirilən forumda layihənin əsaslandırılmış tədqiqatının nəticələri ilk dəfə beynəlxalq investorlara təqdim edilib. Tədqiqata görə, ötürücü infrastruktura investisiyaların 14,3 milyard avro təşkil etməsi proqnozlaşdırılır. Hər biri 1,3 QVt gücündə üç xətt nəzərdə tutulub, ümumi ötürmə gücü 3,9 QVt olacaq. Avropa Birliyinə illik ötürmənin 2032-ci ildən 8 TVt-saat, 2040-cı ilə qədər isə 20 TVt-saat olacağı gözlənilir. Enerji naziri Pərviz Şahbazov layihənin regional enerji təhlükəsizliyi üçün strateji əhəmiyyətini vurğulayıb.