İsrail Cənubi Kipr Rum İdarəsinə açıq dəniz patrul gəmisi verəcək

İsrail Müdafiə Nazirliyinin açıqlamasında bildirilib ki, nazirliyin baş direktoru Amir Baram nümayəndə heyəti ilə Cənubi Kipr Rum İdarəsinə (GKRY) səfər edərək həmin razılaşmanı imzalayıb. Razılaşmaya əsasən, İsrailin Rafael müdafiə şirkətinin dəniz sistemləri ilə təchiz olunacaq bir açıq dəniz patrul gəmisi GKRY-yə təhvil veriləcək.

Açıqlamada, GKRY-yə məxsus, İsraildə istehsal olunmuş IOANNIDES açıq dəniz patrul gəmisinin komanda və müdafiə sistemlərinin də müasirləşdiriləcəyi qeyd edilib. İsrail mətbuatı Tel Əvivin GKRY-nin ən böyük silah təchizatçılarından biri olduğuna diqqət çəkir.

İsrail Prezidenti Herzoq 10 sentyabrda GKRY lideri Nikos Xristodulidisin dəvəti ilə Cənubi Kiprə rəsmi səfər edib. Lakin səfər Fələstinin tərəfdarı olan insan haqları təşkilatlarının geniş etirazları ilə üzləşib.