TÜRKPA Baş katibi Ramil Həsən Türkiyədə Kürşad Zorlu ilə görüşüb

TÜRKPA-nın Baş katibi səfir Ramil Həsən 26 oktyabrda Türkiyəyə rəsmi səfəri çərçivəsində Türkiyənin Böyük Millət Məclisinin üzvü, AK Partiyanın sədr müavini və Türk dövlətləri ilə münasibətlərdən məsul Kürşad Zorlu ilə görüşüb. Bu barədə AZERTAG xəbər verib.

Görüşdə Azərbaycan və Türkiyə arasında qardaşlıq münasibətlərinin və strateji ittifaqın daha da inkişaf etdirilməsinin vacibliyi vurğulanıb. Bildirilib ki, iki ölkə digər qardaş türk dövlətləri üçün nümunə və aparıcı təşviqatçılardır. Həmçinin TÜRKPA-nın parlamentlərarası əməkdaşlığı möhkəmləndirmək, qanunvericiliyi uyğunlaşdırmaq və türk dünyasının birliyini sarsıtmağa çalışan qüvvələrə qarşı birgə səylər göstərmək rolu qeyd edilib.

Kürşad Zorlu Azərbaycan və Türkiyə arasındakı əlaqələrin bütün türk dünyası üçün əhəmiyyətini vurğulayıb və Türkiyənin Assambleyanın fəaliyyətini dəstəkləməyə davam edəcəyini bildirib. Ramil Həsən isə Bişkekdə keçirilən TÜRKPA Şurasının 15-ci iclası və 15-ci Plenar sessiyası barədə ətraflı məlumat verib.