Qırğızıstan prezidenti Caparov: Prezidenti kimin seçəcəyinə xalq qərar verəcək

Qırğızıstan prezidenti Sadır Caparov yerli media orqanına verdiyi müsahibədə seçki prosesi, enerji sektorundakı dəyişikliklər və Aleksey Şirşovun investisiyaları barədə danışıb. Calal-Abad vilayətindəki görüşlərin seçki təbliği olmadığını bildirən Caparov, ilin əvvəlindən bəri bütün rayonları gəzdiyini və noyabrın ortalarında bu işi başa çatdıracağını deyib. O, heç kimi özünə səs verməyə çağırmadığını, seçki sisteminin tam avtomatlaşdırıldığını və inzibati resursun istifadə olunmayacağını vurğulayıb.

Enerji məsələsində Caparov, Kambar-Atada istifadə olunmayan 30 MVt elektrik enerjisinin səbəbini izah edib. Köhnə xətlər və transformatorlar üzündən 2009-cu ildə işə düşən Kambar-Ata-2 stansiyasından yalnız 90 MVt alınabildiyini, buna görə ərazidə mayninq fermasının qurulduğunu bildirib. O, Şirşovun şirkətinin 430 milyon dollarlıq yardımdan əlavə 715 milyon 505 min som dəyərində dəstək verdiyini və NESK-in 137 milyard somluq borcunun bu ilin sonunadək ödəniləcəyini deyib.