İlham Əliyev: işğal olunan ölkə kimi insanlarımızın hüquqlarının pozulmasıyla heç vaxt barışmayacaqdıq

Prezident İlham Əliyev son illərdə əsas məqsədin Azərbaycanın ərazi bütövlüyünün bərpası və Ermənistan tərəfindən işğal edilmiş ərazilərin azad edilməsi olduğunu bildirib. "Report" xəbər verir ki, dövlət başçısı bunu Bakıda "Ortaq gələcək naminə dialoq" mövzusunda VII Ümumdünya Mədəniyyətlərarası Dialoq Forumunun açılış mərasimində çıxışında deyib.

O, illər ərzində danışıqların heç bir nəticə vermədiyini, danışıqlar formatının münaqişənin həll olunmasına deyil, dondurulmuş vəziyyətdə qalmasına yönəldiyini söyləyib. Prezident böyük güclərin bu məsələdə konsensusa gəldiyini, lakin Azərbaycan xalqının və hökumətinin planları ilə bağlı səhv hesablamalar apardığını vurğulayıb.

İşğal olunmuş ölkə kimi insanlarımızın adi insan hüquqlarının pozulması ilə heç vaxt barışmayacaqlarını deyən İlham Əliyev, Azərbaycanın heç vaxt ümidini itirmədiyini bildirib. Onun sözlərinə görə, danışıqların nəticə vermədiyini görən Azərbaycan BMT Nizamnaməsinin 51-ci maddəsinə əsaslanaraq düşməni məğlub edib və illərlə işğal altında olan ərazilərini azad edib. Prezident BMT Təhlükəsizlik Şurasının 1993-cü ildə qəbul etdiyi, Ermənistan qüvvələrinin tam çəkilməsini tələb edən qətnamələrin yalnız kağız üzərində qaldığını əlavə edib.