Bəhçəli: Türkiyə ilə Azərbaycan arasında qardaşlıq sarsılmazdır

Millətçi Hərəkat Partiyasının (MHP) lideri Dövlət Bəhçəli, Ankarada keçiriləcək Türk Dövlətləri Təşkilatının (TDT) zirvə görüşü və təşkilata üzv ölkələrin müstəqilliyinin 35 illiyi ilə bağlı açıqlama yayıb. Onun sözlərinə görə, Türkiyə ilə Azərbaycan arasındakı qardaşlıq bağları tarixən çox güclüdür, siyasi və diplomatik məsələlərdən kənara çıxır və keçici proseslərlə məhdudlaşdırıla bilməz.

Bəhçəli bildirib ki, qardaşlıq iki xalqın iradəsi və birgə mübarizə tarixi ilə möhkəmlənir və nəsildən-nəslə ötürülür. O, anlaşılmazlıqların artmasına yol verilməməsinin vacibliyini vurğulayaraq, "Aramızda nifaq toxumlarının səpilməsinə icazə verməməliyik" deyib. Türk dünyasının birliyinin hansısa dövlətin digərinə hakim olması demək olmadığını, birliyin müstəqil dövlətlərin suveren bərabərliyinə əsaslandığını qeyd edib.

Bəhçəli Ankarada keçiriləcək zirvənin Türkiyəyə, qardaş ölkələrə və bütövlükdə Türk dünyasına fayda verəcəyinə və qardaşlıq bağlarını daha da möhkəmləndirəcəyinə ümid etdiyini bildirib.