KKTC: Kipr türk xalqı ada ətrafındakı təbii sərvətlərin ortaq sahibidir

Kipr türk xalqının ada üzərində və ətrafındakı dənizlərdə olan təbii sərvətlərin ortaq sahibi olduğu bildirilib. KKTC Xarici İşlər Nazirliyi açıqlamasında, Rum administrasiyasının Kipr türk xalqını təmsil etmək və bu sərvətlərlə bağlı onun adından qərar vermək səlahiyyəti olmadığını qeyd edib.

Nazirliyin bildirdiyinə görə, Güney Kipr Rum administrasiyası 26 oktyabrda İtaliyanın ENI şirkəti ilə “Kronos” təbii qaz yatağının istismara verilməsinə dair müqavilələr imzalayıb. Nazirlik bu addımı Kipr türk xalqının adadakı təbii sərvətlər üzərindəki təbii hüquqlarını nəzərə almayaraq həyata keçirilən birtərəfli karbohidrogen fəaliyyətlərinin son nümunəsi adlandırıb.

Açıqlamada GKRY ilə əməkdaşlıq edən beynəlxalq şirkətlər adadakı və regiondakı siyasi reallıqları nəzərə almağa və Kipr türk xalqının hüquqlarını pozan təşəbbüslərdə iştirakın doğuracağı “mənfi” nəticələri düşünməyə çağırılıb. KKTC-nin Türkiyə ilə tam koordinasiya və həmrəylik içində Şərqi Aralıq dənizindəki qanuni hüquq və maraqlarını qətiyyətlə qorumağa davam edəcəyi vurğulanıb.