Prezident: Müharibə bizim seçimimiz olmayıb, bizi buna Ermənistan məcbur edib

Prezident İlham Əliyev bildirib ki, Vətən müharibəsi 44 gün davam edib və bu müddət ərzində Azərbaycan döyüş meydanında 300-dən çox şəhər və kəndi azad edib. APA-nın xəbər verdiyinə görə, dövlət başçısı bunu Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Toplantısında çıxışı zamanı deyib.

Əliyev 2023-cü ilin sentyabrında Azərbaycan əsgərinin dəmir yumruğunun yenidən öz sözünü dediyini qeyd edib. Onun sözlərinə görə, bir sutkadan az müddətdə Ermənistanın Qarabağdakı işğalçı ordusu darmadağın edilib, separatçıların liderləri və uşaq qatilləri isə Azərbaycan məhkəməsinə çıxarılıb. Bakını tanklarla işğal etməklə təhdid edənlər bu gün Azərbaycan həbsxanalarında Azərbaycan çayını içir, onların tankları isə Hərbi Qənimətlər Parkında nümayiş etdirilir.

Prezident bu məsələnin qlobal əhəmiyyət daşıdığını bildirib. O, işğal, soyqırımı və etnik təmizləməyə görə Ermənistana vaxtında sanksiyalar tətbiq edilsəydi, Azərbaycanın döyüş meydanında erməni faşizminin belini qırmağa məcbur qalmayacağını vurğulayıb. Əliyevin sözlərinə görə: “Müharibə bizim seçimimiz olmayıb, bizi müharibəyə Ermənistan məcbur edib”.