Kamran Musayev: Hazırda Azərbaycanda 50-dən çox xəstə ürək transplantasiyası gözləyir

Bakı, 31 oktyabr (AZƏRTAC) - Azərbaycanda və regionda ilk dəfə donordan ürək transplantasiyası əməliyyatı ötən il oktyabr ayının sonlarında həyata keçirilib. Azərbaycan Ürək və Damar Cərrahiyyəsi Cəmiyyətinin fəxri sədri, professor Kamran Musayev AZƏRTAC-a açıqlamasında bu əməliyyatı tarixi uğur adlandırıb və onu ölkədəki səhiyyə sisteminin inkişafının ən vacib göstəricilərindən biri kimi qiymətləndirib.

Professor Musayevin sözlərinə görə, ilk ürək transplantasiyasından sonra transplantasiyaya maraq artıb. Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinə 1500-dən çox Azərbaycan vətəndaşı könüllü olaraq donorluq üçün qeydiyyatdan keçib, bunun böyük əksəriyyəti son bir ildə baş verib. Mərkəzi Klinikanın təqdim etdiyi siyahıya əsasən 50-dən çox xəstə ürək transplantasiyası gözləyir. Gözləyən xəstələr 4-5 yaşından 60 yaşına qədər olan insanlardır.