Azərbaycanda səhiyyə xərclərinin dövlət büdcəsindəki payı artır

Bakı, 31 oktyabr, AZƏRTAC. Azərbaycanda Prezident İlham Əliyevin rəhbərliyi ilə sosial sahəyə, o cümlədən səhiyyəyə diqqət və qayğı gündən-günə artır. Səhiyyə xərclərinin dövlət büdcəsi xərcləri tərkibindəki xüsusi çəkisində artım müşahidə olunur.

Bu il yalnız büdcədən əhalinin sağlamlığının qorunması üçün 2 milyard 100 milyona yaxın vəsait ayrılıb. İcbari Tibbi Sığorta Fondunun vəsaitləri də nəzərə alınarsa, ümumi məbləğ daha böyükdür. Milli Məclisin Səhiyyə komitəsinin sədri Əhliman Əmiraslanov “TRANSPLANT 360° – Diaqnostikadan transplantasiyaya” elmi-praktik konfransının açılış mərasimindəki çıxışında bildirib ki, 5-6 il əvvəl büdcədən səhiyyəyə ayrılan vəsait maksimum 800 milyon idi, indi isə 4 milyard civarındadır.

Onun sözlərinə görə, bu, dövlət başçısının bu sahəyə ciddi diqqət verdiyini göstərir və hər il ayrılan vəsaitlər artır.