Azərbaycanda ilk donor ürək transplantasiyasının birinci ildönümünə həsr olunan konfrans

Azərbaycanda və Cənubi Qafqazda ilk donor ürək transplantasiyasının həyata keçirilməsinin birinci ildönümü münasibətilə “Ürək transplantasiyası həftəsi” çərçivəsində konfrans keçirilib. Konfransda yerli mütəxəssislərlə yanaşı Böyük Britaniya, Türkiyə və Belarusdan transplantasiya üzrə ixtisaslaşmış mütəxəssislər iştirak edib.

Konfransın açılışında səhiyyə nazirinin müavini Nadir Zeynalov tədbirin əsas məqsədinin diaqnostikadan donor seçiminə, cərrahi müdaxilədən əməliyyatdan sonrakı müşahidəyə qədər orqan transplantasiyasının bütün mərhələlərini müzakirə etmək, nəticələri qiymətləndirmək və çağırışları müəyyənləşdirmək olduğunu bildirib. Professor Kamran Musayev hazırda 50-dən çox xəstənin ürək transplantasiyası gözlədiyini deyib.

Orqan Donorluğu və Transplantasiya üzrə Koordinasiya Mərkəzinin İdarə Heyətinin sədri Yeganə Abbasova ürək və gözün buynuz qişasının transplantasiyasının icbari tibbi sığorta xidmətlərinə daxil edilməsinin vacibliyini vurğulayıb. Milli Məclisin Səhiyyə komitəsinin sədri Əhliman Əmiraslanov müstəqillik qazandıqdan sonra Azərbaycanın orqan transplantasiyası sahəsində bir sıra uğurlar əldə etdiyini və yeni dövlət büdcəsində səhiyyə xərclərinin artırıldığını bildirib.