Günay Əfəndiyeva: Azərbaycan-Özbəkistan qardaşlığını qorumalıyıq

Bakı, 3 noyabr (AZƏRTAC). Milli Məclisin Mədəniyyət komitəsinin sədr müavini Günay Əfəndiyeva AZƏRTAC-a açıqlamasında bildirib ki, bu gün parlamentdə müzakirə olunan qanun layihələri arasında Azərbaycan ilə Özbəkistanın qardaşlığını və tərəfdaşlığını dərinləşdirən mühüm sənədlər var. O, geosiyasi gərginliklər fonunda tarixi bağların, ortaq dəyərlərin və qarşılıqlı etimadın qorunmasının vacib olduğunu vurğulayıb.

Deputat Orta əsrlərdə Əlişir Nəvainin Nizami Gəncəvi irsinə bağlılığını, ötən yüzillikdə Mirvarid Dilbazi ilə Zülfiyyənin dostluğunu və repressiya qurbanı yazıçılar Hüseyn Cavid ilə Əbdürrauf Fitrətin yaradıcılığı arasındakı yaxınlığı xatırladıb. Onun sözlərinə görə, münasibətlər Azərbaycan Prezidenti İlham Əliyevlə Özbəkistan Prezidenti Şavkat Mirziyoyevin birgə siyasi iradəsi nəticəsində üst səviyyəyə çatdırılıb.

Əfəndiyeva cari il avqustun 23-də Daşkənddə imzalanan “Əbədi dostluq haqqında Müqavilə”ni dövlətlərarası miqyasda qardaşlıq duyğularının əksi kimi qiymətləndirib. O, ölkələrin parlamentləri arasında dostluq əlaqələrinin uğurla davam etdirildiyini və keçən il Xivədə keçirilən Birinci Özbəkistan–Azərbaycan parlamentlərarası Forumunun yeni ənənənin əsasını qoyduğunu bildirib.