Мирзиёев: ЖИ-дің жылдам дамуы жаңа сын-қатерлер туғызып отыр

Өзбекстан Президенті Шәвкат Мирзиёев Ақаба процесі аясында Орталық Азия мемлекет басшыларының жасанды интеллект қауіпсіздігіне арналған кездесуіне қатысты. Саммит 6 қарашада Астанада өтті, бұл туралы мемлекет басшысының баспасөз қызметі хабарлады.

Іс-шараға Қазақстан Президенті Қасым-Жомарт Тоқаев, Тәжікстан Президенті Эмомали Рахмон, Түркменстан Президенті Сердар Бердімұхамедов, Иордания королі Абдалла II, сондай-ақ Әзербайжан мен Қырғызстан өкілдері қатысты. Мирзиёев жасанды интеллекттің жылдам дамуы адамзат үшін үлкен мүмкіндіктер ашатынын, бірақ жаңа сын-қатерлер туғызатынын атап өтті. Оның айтуынша, қауіпсіздіктің маңызды негізі — сапалы білім беру және адам әлеуетін толық жүзеге асыруға жағдай жасау.

Мемлекет басшысы «Адам мүддесі үшін цифрлық даму» бастамасын ұсынып, жасанды интеллектті басқару бойынша БҰҰ-ның Жаһандық диалогын қолдады. Ол Өзбекстанда БҰҰ-ның Терроризмге қарсы басқармасының өңірлік кеңсесін ашуға дайын екенін мәлімдеді және Ташкенттегі Ислам өркениеті орталығы базасында халықаралық бағдарлама іске қосуды ұсынды. Оның сөзінше, жасанды интеллекттің болашағы технологиялық прогреске де, оны пайдалану мақсаттарына да байланысты.