Қашағанда газ өңдеу зауыттары салынады

Премьер-министр Олжас Бектенов Қатардың «Power International Holding (PIH)» компаниясының басшылары Муатаз Әл-Хаят пен Рамез Әл-Хаятпен бірлескен жобалардың жүзеге асырылу барысын талқылады. Кездесуде газ өңдеу мен телекоммуникация салаларындағы ынтымақтастық мәселелері қаралды.

Энергетика министрлігінің мәліметінше, PIH холдингі энергетика саласындағы бірқатар бірлескен жобаға қатысады. Қашаған кен орнында жылына 1 млрд және 2,5 млрд текше метр қуатты екі газ өңдеу зауыты салу көзделген. Жылына 1 млрд текше метр қуатты зауыттың құрылыс-монтаж жұмысы жүргізілуде, ол 2027 жылы пайдалануға беріледі; екінші зауытты аяқтау 2030 жылға жоспарланған.

Сондай-ақ «Бейнеу – Бозой – Шымкент» магистралдық газ құбырының екінші желісін салу жобасы жүзеге асырылып жатыр. Премьер-министр нысандарды уақтылы пайдалануға беру үшін бірлескен жұмысты жандандыру қажеттігін атап өтті, Үкімет туындаған мәселелерді шешуге қолдау көрсететінін айтты. Холдинг басшылары өзара тиімді ынтымақтастыққа мүдделі екенін білдірді.