Kaşağanda qaz emalı zavodları tikiləcək

Baş nazir Olcas Bektenov Qatarın "Power International Holding (PIH)" şirkətinin rəhbərləri Muataz Əl-Həyat və Ramez Əl-Həyat ilə birgə layihələrin həyata keçirilmə gedişatını müzakirə edib. Görüşdə qaz emalı və telekommunikasiya sahələrində əməkdaşlıq məsələləri nəzərdən keçirilib.

Energetika Nazirliyinin məlumatına görə, PIH enerji sahəsində bir sıra birgə layihədə iştirak edəcək. Kaşağan yatağında ildə 1 milyard və 2,5 milyard kub metr gücündə iki qaz emalı zavodu tikilməsi nəzərdə tutulub. İldə 1 milyard kub metr gücündə zavodda tikinti-quraşdırma işləri aparılır və 2027-ci ildə istifadəyə veriləcək; ikinci zavodun tamamlanması isə 2030-cu ilə planlaşdırılır.

Beyneu–Bozoy–Şımkent magistral qaz kəmərinin ikinci xəttinin tikintisi də davam edir. Baş nazir obyektlərin vaxtında istifadəyə verilməsi üçün birgə işin sürətləndirilməsinin vacibliyini vurğulayıb, hökumətin yaranan məsələlərdə dəstək göstərəcəyini bildirib. Holdinq rəhbərləri qarşılıqlı faydalı əməkdaşlığa maraqlı olduqlarını təsdiq ediblər.