Ақтоғай мыс балқыту зауытында мыңнан астам жұмыс орны ашылады

Президент Қасым-Жомарт Тоқаев телекөпір режимінде Ақтоғай мыс балқыту зауытының құрылысын бастау рәсіміне қатысты. Ол зауытты тұтас ел экономикасының өркендеуіне тың серпін беретін аса маңызды жобалардың бірі деп атады. Бұл туралы Ақорда баспасөз қызметі хабарлады.

Кәсіпорында кен байытудан бастап дайын металл шығаруға дейінгі толық өндірістік цикл қарастырылған. Кешен өзінің кен орнынан алынған мыс концентратын өңдейді. Жобаны KAZ Minerals тобы жүзеге асырады, ал қытайлық NFC компаниясы инженерлік серіктес болады. Бастамаға шамамен 1,8 миллиард доллар инвестиция салынып, 1 мыңнан астам жаңа жұмыс орны ашылады.

2030 жылы алғашқы мыс катодын алу жоспарланып отыр. Зауытта мыстан бөлек алтын, күміс және басқа да ілеспе өнімдер шығарылады. Хабарда елімізде екі жылда 54 жаңа кен орны ашылғаны да айтылды.