Өзбек әліпбиі жаңарады: қандай өзгерістер енгізілді?

Өзбекстанда латын графикасына негізделген өзбек әліпбиінің жаңартылған нұсқасы 2027 жылғы 22 сәуірден бастап қолданысқа енгізіледі. Тиісті заңға сәрсенбі күні Өзбекстан президенті Шавкат Мирзиёев қол қойды, деп хабарлайды Egemen.kz.

Жаңа заңға сәйкес, оның күшіне енгенге дейін берілген барлық құжат, ұлттық валюта және ресми бағалы қағаздар жарамдылығын сақтайды. Мемлекеттік рәміздер, маңдайшалар мен ұйымдардың эмблемалары тозуына байланысты ауыстырылғанға дейін немесе екі ай ішінде бекітілетін енгізу бағдарламасына сәйкес жаңартылғанға дейін қолданыла береді.

Жаңартылған әліпби 28 әріп пен апострофтан тұрады. Бірнеше әріптен құралған тіркестер мен кейбір таңбалар жеке әріптермен алмастырылып, әріптер жүйесі ықшамдалады. Латын графикасына негізделген жазу жүйесі алғаш рет 1993 жылы қабылданып, 1995 жылы өзгерістер енгізілді. Кириллицадан толық бас тарту бастапқыда 2000 жылға жоспарланғанымен, қазірге дейін екі жазу жүйесі де қатар қолданылып келеді. Қазіргі реформа 2020 жылы қабылданған президент жарлығына негізделген, оның мақсаты тіл саясатын жаңғыртып, латын графикасына көшу үдерісін аяқтау.