Özbək əlifbası yenilənir: hansı dəyişikliklər edilib?

Özbəkistanda Latın qrafikasına əsaslanan Özbək əlifbasının yenilənmiş variantı 2027-ci il 22 aprelindən qüvvəyə minəcək. Müvafiq qanunu Özbəkistan Prezidenti Şavkat Mirziyoyev çərşənbə günü imzalayıb. Xəbəri Egemen.kz yayıb.

Yeni qanuna görə, qüvvəyə minənədək verilmiş bütün sənədlər, milli valyuta və rəsmi qiymətli kağızlar etibarlılığını saxlayacaq. Dövlət rəmzləri, lövhələr və təşkilatların emblemləri köhnəlməyə görə dəyişdirilənədək və ya iki ay ərzində təsdiqlənəcək tətbiqetmə proqramına uyğun yenilənənədək istifadə oluna biləcək.

Yenilənmiş əlifba 28 hərf və apostrofdan ibarətdir. Bir neçə hərfdən ibarət birləşmələrin və bəzi işarələrin yerini ayrıca hərflər tutacaq, beləliklə hərf sistemi sadələşdiriləcək. Latın yazısı 1993-cü ildə qəbul edilib, 1995-ci ildə dəyişdirilib. Kiril yazısından tam imtina 2000-ci il üçün planlaşdırılsa da, hələ də hər iki yazı paralel işlədilir. İslahat 2020-ci ildə qəbul edilmiş prezident fərmanına əsaslanır və məqsədi dil siyasətini yeniləmək və Latın yazısına keçid prosesini tamamlamaqdır.