Мемлекет басшысы: жеті жыл ішінде он мыңдаған шақырым автокөлік жолы мен темір жолдар салынды

Мемлекет басшысы Қасым-Жомарт Тоқаев Республика күніне арналған салтанатты жиында Қазақстанның көлік инфрақұрылымы мен цифрлық технологиялар саласындағы жетістіктеріне тоқталды. Egemen.kz хабарлаунша, Тоқаев соңғы жеті жылда он мыңдаған шақырым автокөлік жолы мен теміржол салынып, жөнделгенін айтты.

Мемлекет басшысы Еуропа мен Азияны жалғайтын көлік, энергетика және цифрлық тораптардың Қазақстан арқылы өтетінін атап өтті. Ол сындарлы және жауапты сыртқы саясаттың арқасында елдің халықаралық беделі артқанын, Қазақстан төлқұжатының мәртебесі жоғары екенін және азаматтары мен бизнес өкілдері үшін барлық елдің есігі ашық екенін айтты.

Цифрлық даму саласында Тоқаев елордадағы Alem.ai халықаралық жасанды интеллект орталығы мен Astana Hub технопаркін атап өтті. ІТ қызметтерінің экспорты 1 миллиард доллардан асқанын, екі суперкомпьютер іске қосылғанын айтты. Digital Qazaqstan жалпыұлттық стратегиясын жүзеге асыру басталғаны да хабарланды. Сонымен қатар Мемлекет басшысының Жарлығымен «Kazakhmys Smelting» ЖШС Жезқазған мыс балқыту зауытының балқытушысы Әбдірашит Доспановқа «Қазақстанның Еңбек Ері» атағы берілді.