Каспий теңізіндегі 14 мерзімді әскери қызметшінің қазасы: 6 лауазымды тұлға ұсталды

Қазақстан Республикасы Ішкі істер министрлігі Каспий теңізіндегі 14 мерзімді әскери қызметшінің қаза болуымен байланысты сотқа дейінгі тергеу барысы туралы хабарлады. Министрліктің баспасөз қызметі NUR.KZ тілшісіне мәлімдегеніндей, әскери тергеу департаментінің басшылығымен құрылған ведомствоаралық жедел-тергеу тобы сотқа дейінгі тергеуді жалғастыруда. Оқиға Ақтауда болды.

Тергеу Қазақстан Республикасы Қылмыстық кодексінің «Қызметке салақ қарау» және «Кеме жүргізу ережелерін бұзу» баптары бойынша жүргізілуде. Сот санкциясымен әскери-теңіз жаттығуларын ұйымдастыруға және өткізуге жауапты алты лауазымды тұлғаға қатысты қамауға алу шарасы қолданылды.

Министрлік хабарлағандай, басқа лауазымды тұлғалардың да қатысы тексерілуде. Сотқа дейінгі тергеу нәтижелері бойынша жаттығуды жоспарлауға, ұйымдастыруға және өткізуге қатысқан барлық лауазымды тұлғалардың әрекетіне Қазақстан заңнамасына сәйкес заңды баға берілетін болады. Баспасөз қызметі сотқа дейінгі тергеудің басқа деректері жария етілмейтінін атап өтті.