Қазақстанның жаңа Конституциясы: Миранда қағидаты және саяси тұрақтылық

Қазақстан Конституциясына енгізілген өзгерістер елдің саяси-құқықтық жүйесін жаңғыртуда және болашақ даму бағытын айқындауда маңызды рөл атқарады, деп жазады «Егемен Қазақстан». Жаңа Конституция жарияланғаннан кейін «Миранда қағидаты» көп талқыланды. Заңгер Нұрлан Жаңабаев бекітілген нормаға сәйкес құқық қорғау органдары адамды ұстаған сәттен бастап оның құқықтары мен ұсталу себептерін дереу түсіндіруге тиіс екенін айтты. Оның айтуынша, азаматтың үнсіз қалуға және адвокат көмегін пайдалануға құқығы бар, ал берген түсініктемелері оған қарсы дәлел ретінде қолданылуы мүмкін екені міндетті түрде ескертілуі керек.

Саясаттанушы Жандос Сәрсенбеков жаңа Конституцияны Мемлекет басшысы ұсынған «Күшті Президент – Ықпалды Парламент – Есеп беретін Үкімет» қағидатын толық жүзеге асыруға бағытталған маңызды қадам деп санайды. Ол Президенттің бастамалары ел игілігіне қызмет ететінін атап өтіп, геосаяси тұрақсыздық және көршілес мемлекеттер арасындағы қақтығыстар жағдайында Қазақстан үшін ішкі саяси тұрақтылықтың ерекше маңызды екенін айтты.