Қазақстанда ең төмен жалақының өсуі бизнеске 430 млрд теңге шығын әкеледі

Ұлттық экономика министрінің бірінші орынбасары Азамат Әмрин үкіметтегі брифингте ең төмен жалақыны 85 мың теңгеден 110 мың теңгеге көтеру Қазақстандағы жалақы қорын шамамен 430 млрд теңгеге ұлғайтатынын мәлімдеді. Оның айтуынша, жұмыс берушілер қазір 85 мың теңге алып жүрген қызметкерлерге кемінде 110 мың теңге төлеуі тиіс. Президент Халыққа Жолдауында өсім шамамен 1,8 млн адамға әсер ететінін айтқан.

Ұлттық экономика министрлігінің алдын ала есептеулері бойынша жалақы қоры шамамен 426 млрд теңгеге өседі, бұл соманы министрлік бизнеске қосымша жүк ретінде бағалайды. Әмрин жалақы қорының ұлғаюымен шегерімдер де артатынын және компаниялар корпоративтік табыс салығын шамамен 60-68 млрд теңгеге аз төлейтінін айтты. Есептеулерге тек қазір ең төмен жалақы төлеп жатқан компаниялар кіреді. Әмрин бағалауынша, өсім өнім өзіндік құнына айтарлықтай әсер етпеуі және бағаның байқарлықтай өсуіне әкелмеуі тиіс.

Ең төмен жалақының өсуі әлеуметтік төлемдерге де әсер етеді. Бір жарым жасқа дейінгі балаға күтім жасау жәрдемақысының қазіргі ең жоғары мөлшері жеті еселенген ең төмен жалақының 40 пайызын құрайды, өсімнен кейін ол шамамен 308-310 мың теңге болады. Ең төмен жалақы соңғы рет 2024 жылғы 1 қаңтарда 70 мың теңгеден 85 мың теңгеге көтерілген.