Өзбекстан 2030-жылга чейин жумушсуздук деңгээлин 4 пайызга түшүрүүнү пландап жатат

Өзбекстанда 2030-жылга чейин жумушсуздуктун деңгээлин 4 пайызга чейин төмөндөтүү пландалууда. Бул тууралуу Кедейликти азайтуу жана жумуш менен камсыздоо министрлиги даярдаган долбоордо айтылат, ал ченемдик-укуктук актылардын долбоорлорун талкуулоо порталына жайгаштырылган.

Долбоорго ылайык, 2030-жылга чейин расмий эмес секторда иштеген калктын жалпы жумуш менен камсыз болуудагы үлүшүн 25 пайызга чейин азайтуу көзделген. Аялдар арасындагы жумушсуздукту 5 пайызга, жаштар арасындагы жумушсуздукту 4,5 пайызга чейин түшүрүү максат кылынган. Башкаруу кызматтарындагы аялдардын үлүшүн 35 пайызга жеткирүү да пландалууда.

Стратегияда 700 миң жумушсуз жана расмий киреши жок жумуш издегенди ваучер негизинде кесиптик окутуу, ишкердүүлүк жана чет тилдерин окутуунун чыгымдарын жабуу каралган. Ошондой эле 2030-жылга чейин «жашыл» экономика багыттарында 50 миң жаңы жумуш орду түзүп, жумуш менен камсыздоо кызматтарынын 70 пайызын санариптөө пландалууда. 2025-жылы өлкөдө 745 миң жумушсуз болуп, жумушсуздук деңгээли 4,8 пайызды түзгөн.