Өзбекстан 2030 жылға дейін жұмыссыздық деңгейін 4 пайызға түсіруді жоспарлап отыр

Өзбекстанда 2030 жылға дейін жұмыссыздық деңгейін 4 пайызға дейін төмендету жоспарланып отыр. Бұл туралы Кедейлікті азайту және жұмыспен қамту министрлігі дайындаған құжат жобасында айтылған, ол нормативтік-құқықтық актілер жобаларын талқылау порталына орналастырылған.

Құжат бойынша 2030 жылға қарай бейресми секторда жұмыс істейтін халықтың жалпы жұмыспен қамтудағы үлесін 25 пайызға дейін азайту көзделген. Әйелдер арасындағы жұмыссыздықты 5 пайызға, жастар арасындағы жұмыссыздықты 4,5 пайызға дейін түсіру мақсат етілген. Басқару лауазымдарындағы әйелдердің үлесін 35 пайызға жеткізу жоспарлануда.

Стратегияда 700 мың жұмыссыз және ресми табысы жоқ жұмыс іздеушіні ваучер негізінде кәсіптік оқыту, кәсіпкерлік және шет тілдерін оқыту шығындарын өтеу көзделген. Сондай-ақ 2030 жылға дейін «жасыл» экономика бағыттарында 50 мың жаңа жұмыс орнын құру және жұмыспен қамту қызметтерінің 70 пайызын цифрландыру жоспарланған. 2025 жылы елде 745 мың жұмыссыз болып, жұмыссыздық деңгейі 4,8 пайызды құраған.