Özbəkistan 2030-cu ilə qədər işsizlik səviyyəsini 4 faizə endirməyi planlaşdırır

Özbəkistanda 2030-cu ilə qədər işsizlik səviyyəsinin 4 faizə endirilməsi planlaşdırılır. Kasıblığın azaldılması və məşğulluq nazirliyi tərəfindən hazırlanan sənəd layihəsi normativ-hüquqi aktların layihələrinin müzakirəsi portalında yerləşdirilib.

Sənəd layihəsinə görə, 2030-cu ilə qədər qeyri-rəsmi sektorda çalışanların ümumi məşğulluqdakı payı 25 faizə endiriləcək. Qadınlar arasında işsizlik 5 faizə, gənclər arasında isə 4,5 faizə qədər azaldılması hədəflənir. Rəhbər vəzifələrdə qadınların payının 35 faizə çatdırılması planlaşdırılır.

Strategiyada 700 min işsiz və rəsmi gəliri olmayan iş axtaran şəxsin peşə təhsili, sahibkarlıq və xarici dil təlimlərinin xərclərinin vauçer əsasında ödənilməsi nəzərdə tutulur. Həmçinin 2030-cu ilə qədər 50 min yeni yaşıl iqtisadiyyat iş yeri yaradılması və məşğulluq xidmətlərinin 70 faizinin rəqəmsallaşdırılması hədəflənir. 2025-ci ildə ölkədə 745 min işsiz və 4,8 faiz işsizlik səviyyəsi qeyd edilib.