Бишкектен Баткенге чейин 65 объектте 83 миңден ашуун батир курулууда

Мамлекеттик ипотекалык компания өлкөнүн жети облусунда, Бишкек шаарынан Баткен облусуна чейинки 65 объектте 83 миңден ашуун батирдин курулушун жүргүзүүдө. Бул тууралуу президент Садыр Жапаров Бишкектеги «Мурас» турак жай комплексинде батирлерди тапшыруу аземинде билдирди.

Жапаровдун айтымында, комплекстин алгачкы эки этабында буга чейин 2 миңден ашуун батир пайдаланууга берилген. Бүгүн берилген 1104 батир менен бул аймакта жалпы 3170 батирдин курулушу толук аяктаган. Төртүнчү этапты кийинки жылдын июнь айында бүтүрүү, анда 1584 батир берүү тапшырмасы коюлган. Ошондо комплекс 39 блоктон турган 4754 батирди камтыйт.

Республика боюнча жалпы 9371 батир пайдаланууга берилгенин айткан Жапаров, жарандардын жаңы үйлөрүндө жашап жатканын белгиледи. Бүгүн «Мурас» комплексинде 1104 үй-бүлө батирлердин ачкычтарын алды.