Bişkekdən Batkenə qədər 65 obyektdə 83 mindən çox mənzil tikilir

Dövlət İpoteka Şirkəti Qırğızıstanın yeddi vilayətində, Bişkekdən Batken vilayətinə qədər 65 obyektdə 83 mindən çox mənzilin tikintisini həyata keçirir. Bu barədə dövlət başçısı Sadır Caparov Bişkekdəki Muras yaşayış kompleksində mənzillərin təhvil verilməsi mərasimində bildirib.

Caparovun sözlərinə görə, kompleksin ilk iki mərhələsində əvvəllər 2 mindən çox mənzil istifadəyə verilmişdi. Bu gün təhvil verilən 1104 mənzillə birlikdə həmin ərazidə ümumilikdə 3170 mənzilin tikintisi tamamlanıb. Dördüncü mərhələnin gələn ilin iyun ayında bitirilməsi və orada 1584 mənzilin verilməsi tapşırılıb. Beləliklə, kompleks 39 bloka bölünmüş 4754 mənzili əhatə edəcək.

Ölkə üzrə ümumilikdə 9371 mənzilin istifadəyə verildiyini deyən Caparov, vətəndaşların yeni evlərində yaşadığını bildirib. Bu gün Muras kompleksində 1104 ailə mənzil açarlarını alıb.