Трамп G20 саммитинде Касым-Жомарт Токаев менен жолугарын айтты

АКШ президенти Дональд Трамп декабрь айында өтүүчү G20 саммитинде Казакстан президенти Касым-Жомарт Токаев менен жолугарын жарыялады. Ал муну Казакстандын Республика күнүнө карата жөнөткөн куттуктоо телеграммасында билдирди. Телеграмманын толук тексти Акорда тарабынан жарыяланды.

Трамптын айтымында, өткөн жылы эки өлкө эл аралык тынчтык жана коопсуздук чөйрөсүндөгү кызматташтыктан баштап, эки тарапка пайда алып келген маанилүү коммерциялык келишимдерге чейин өнөктөштүгүн тереңдеткен. Ал 1991-жылы АКШ Казакстанды эл аралык аренада биринчи болуп эгемен мамлекет катары таанып тургандыгын эскертти. Трамп Америка Кошмо Штаттарынын Казакстандын көз карандысыздыгына, эгемендигине жана аймактык бүтүндүгүнө берилгендигинин өзгөрбөй турганын айтты. Ошондой эле ал америкалык компаниялардын Казакстандын экономикалык ийгиликтериндеги ролун белгиледи.

Трамп өлкөлөр ортосундагы бекемделип жаткан достуктун көп жылдар бою так натыйжа берерине ишенимин билдирип, G20 саммитинде Токаев менен жолугууну сабырсыздык менен күтөрүн жазды. Ошондой эле Владимир Путин, Си Цзиньпин, Шавкат Мирзиёев, Садыр Жапаров, Эмомали Рахмон, Сердар Бердимухамедов, Режеп Тайип Эрдоган, Ильхам Алиев жана Эммануэль Макрон сыяктуу лидерлер да Токаевге жана казак элине куттуктоо жөнөтүштү.