Tramp G20 sammitida Qosim-Jomart Toqayev bilan uchrashadi

AQSh prezidenti Donald Tramp dekabr oyida boʻlib oʻtadigan G20 sammitida Qozogʻiston prezidenti Qosim-Jomart Toqayev bilan uchrashishini eʼlon qildi. Tramp buni Qozogʻistonning Respublika kuni munosabati bilan yuborgan tabriknomasida bildirdi. Tabriknomaning toʻliq matnini Akorda eʼlon qildi.

Trampning soʻzlariga koʻra, oʻtgan yil davomida ikki davlat xalqaro tinchlik va xavfsizlik sohasidagi hamkorlikdan tortib, ikkala mamlakatga foyda keltiradigan muhim tijorat bitimlarigacha boʻlgan aloqalarini chuqurlashtirgan. U 1991-yilda AQSh Qozogʻistonni xalqaro maydonda suveren davlat sifatida birinchi boʻlib tan olganini eslatdi. Vashington Qozogʻistonning mustaqilligi, suverenitetiga va hududiy yaxlitligiga sadoqatini oʻzgartirmasligini taʼkidladi. Tramp shuningdek, amerikalik kompaniyalarning Qozogʻistonning iqtisodiy yutuqlarida muhim rol oʻynaganini aytdi.

Tramp mamlakatlar oʻrtasidagi mustahkamlanayotgan doʻstlik koʻp yillar davomida aniq natijalar berishiga ishonchini bildirdi hamda G20 sammitida Toqayev bilan uchrashishni sabrsizlik bilan kutayotganini aytdi. Shu bilan birga, Vladimir Putin, Si Szinpin, Shavkat Mirziyoyev, Sadir Japarov, Emomali Rahmon, Rajab Toyib Erdoʻgʻan va Ilhom Aliyev kabi rahbarlar ham Toqayevga va Qozogʻiston xalqiga tabriklar yubordi.