Samarkandda Bütindünýä sammiti başlandy

Samarkandda «Çagalaryň abadanlygyna maýa goýum: geljek nesiller üçin durnukly we adalatly ösüşe tarap» temasy boýunça Bütindünýä sammitiniň açylyş dabarasy başlandy. Özbegistanyň Prezidenti Şawkat Mirziýoýewiň sammit gatnaşyjylaryna ýüzlenen salamyny matbugat sekretary Ş. Asadow okady.

Dabarada BMG-niň Baş Assambleýasynyň 81-nji mejlisiniň başlygy Halilur Rahman hem çykyş etdi. Ol Özbegistanyň ýolbaşçylygyna sammitiň başlangyjy we çäräniň ýokary derejede guralandygy üçin minnetdarlyk bildirdi. BMG-niň Baş sekretary Antoniu Guterrişiň ýüzlenmesini BMG-niň Özbegistandaky hemişelik wekili Sabine Mahl okady. Sammitde Özbegistanyň Birinji ledi we halkara «Zamin» jemgyýetçilik gaznasynyň hossarlar geňeşiniň başlygy Ziroat Mirziýoýewa hem çykyş edip, gatnaşyjylara netijeli iş arzuw etdi.

Iki günlük sammitiň çäklerinde çagalar onkologiýasy boýunça II Halkara kongresi hem geçiriler. Çäreler Özbegistanyň başlangyjy bilen, çagalara garşy zorluk boýunça BMG-niň Aýratyn wekili, BMG-niň Çagalar gaznasy (UNICEF), Bütindünýä saglygy goraýyş guramasy we Bütindünýä banky bilen hyzmatdaşlykda guraldy. Çärelere 100-den gowrak ýurduň we halkara guramalaryň wekilleri, daşary ýurt we ýerli eksperter hem jemgyýetçilik işgärleri gatnaşýar.