Samarqandda Jahon sammiti boshlandi

Samarqandda «Bolalar farovonligiga sarmoya kiritish: kelajak avlodlar uchun barqaror va adolatli rivojlanish sari» mavzusidagi Jahon sammitining ochilish marosimi boshlandi. Oʻzbekiston Respublikasi Prezidenti Shavkat Mirziyoyevning ishtirokchilarga yoʻllagan salomini matbuot kotibi Sh.Asadov oʻqib eshittirdi.

Marosimda BMT Bosh Assambleyasining 81-sessiyasi raisi Xalilur Rahmon ham soʻzga chiqdi. U Oʻzbekiston rahbariyatiga sammit tashabbusi va tadbirning yuqori darajada tashkil etilgani uchun minnatdorchilik bildirdi. BMT Bosh kotibi Antonio Guterrishning murojaatini BMTning Oʻzbekistondagi doimiy vakili Sabine Mahl oʻqidi. Sammitda Oʻzbekistonning Birinchi xonimi, xalqaro «Zamin» jamoat fondi homiylik kengashi raisi Ziroat Mirziyoyeva ham nutq soʻzladi va ishtirokchilarga samarali ish tiladi.

Ikki kunlik sammit doirasida bolalar onkologiyasi boʻyicha II Xalqaro kongress ham oʻtkaziladi. Tadbirlar Oʻzbekiston tashabbusi bilan, bolalarga nisbatan zoʻravonlik boʻyicha BMT maxsus vakili, BMT Bolalar jamgʻarmasi (YuNISEF), Jahon sogʻliqni saqlash tashkiloti va Jahon banki hamkorligida tashkil etildi. Tadbirlarda dunyoning 100 dan ortiq davlati va xalqaro tashkilotlari vakillari, xorijiy va mahalliy ekspertlar hamda jamoat arboblari ishtirok etmoqda.