Oʻzbekistonda asosiy stavka kelgusi uch yilda bir xonali darajaga tushishi mumkin

Oʻzbekistonda kelgusi uch yilda asosiy stavka bir xonali darajagacha pasaytirilishi mumkin. Bu haqda Markaziy bank raisi oʻrinbosari Nodirbek Ochilov 3-noyabr kuni asosiy stavkaga bagʻishlangan matbuot anjumanida maʼlum qildi. Uning soʻzlariga koʻra, 2027–2029-yillarga moʻljallangan pul-kredit siyosati yoʻnalishlari tasdiqlangan. Hujjatga muvofiq, inflyatsiya maqsadli darajaga, yaʼni 5 foizga pasaygan taqdirda asosiy stavkani 10 foizdan tushirish imkoni paydo boʻladi. Hozir bu koʻrsatkich 14 foizni tashkil etmoqda.

Sentyabr oyida inflyatsiya 6,4 foizni tashkil etdi. Biroq ichki talabning yuqoriligi va tashqi sharoitlar bilan bogʻliq inflyatsion xatarlar saqlanib qolmoqda. Ochilovning taʼkidlashicha, asosiy stavkani 14 foizda saqlab qolish qarori narx oʻzgarishlarining ikkilamchi taʼsirlari keng tarqalishining va inflyatsion kutilmalar kuchayishining oldini olishga xizmat qiladi.

3-noyabrdagi boshqaruv yigʻilishida stavkani 14 foizda saqlab qolish yoki 13,5 foizgacha pasaytirish ssenariylari muhokama qilingan. Koʻproq ovoz 14 foizlik stavkani saqlab qolish pozitsiyasiga tegishli boʻldi. 2026-yil yanvar–sentabr oylarida Oʻzbekiston YaIM 8,3 foizga oʻsdi, oʻrtacha oylik ish haqi real hisobda 10,7 foizga koʻpaydi. Yil yakunida real iqtisodiy oʻsish 8 foiz atrofida boʻlishi kutilmoqda.