Qirgʻizistonning davlat banklari sanksiya xavfi yuqori boʻlgan 284 kompaniya bilan aloqani uzdi

Qirgʻizistonning ikkita davlat banki sanksiya xavfi yuqori boʻlgan 284 ta kompaniya bilan biznes munosabatlarini toʻxtatdi. Yana 41 ta kompaniya tekshiruv va monitoring bosqichida. Bu haqda hukumat 5-noyabrda oʻtkazilgan idoralararo ishchi guruh yigʻilishi natijalari boʻyicha xabar berdi. Yigʻilishga prezidentning sanksiya siyosati boʻyicha maxsus vakili, iqtisodiyot va savdo vaziri Bakit Sidiqov raislik qildi.

Ishtirokchilar yuqori xavfli yuridik shaxslarning tekshiruv natijalari va tegishli roʻyxatni shakllantirish masalalarini muhokama qildi. 2026-yil 5-noyabr holatiga koʻra, Abank 115 ta kompaniya bilan munosabatlarini toʻxtatgan, taxminan 37 ta tashkilot monitoringda. Eldik Bank 169 ta kompaniyaga xizmatni toʻxtatgan, yana toʻrt ta kompaniya tekshirilmoqda. Hukumat maʼlumotiga koʻra, sanksiya xavfining yuqoriligi tashkilotning qonunni buzganini yoki xalqaro sanksiya roʻyxatlariga kiritilganini bildirmaydi.

Yigʻilishda Yevropa Ittifoqi, AQSh va Buyuk Britaniya bilan hamkorlik masalalari ham koʻrib chiqildi. Sidiqov davlat organlari, moliyaviy tartibga soluvchilar va banklar oʻrtasida sanksiya xavflarini oʻz vaqtida aniqlash uchun birgalikdagi ishni davom ettirish zarurligini taʼkidladi.