Қырғызстанның мемлекеттік банктері санкциялық тәуекелі бар 284 компаниямен қарым-қатынасты тоқтатты

Қырғызстанның екі мемлекеттік банкі санкциялық тәуекелі жоғары 284 компаниямен іскерлік қарым-қатынасын тоқтатты. Тағы 41 компания тексеру және мониторинг кезеңінде. Бұл туралы үкімет 5 қарашада өткен ведомствоаралық жұмыс тобы отырысының қорытындысы бойынша хабарлады. Отырысқа президенттің санкциялық саясат жөніндегі арнайы өкілі, экономика және коммерция министрі Бақыт Сыдықов төрағалық етті.

Қатысушылар санкциялық тәуекелі жоғары заңды тұлғаларды тексеру нәтижелерін және тиісті тізімді қалыптастыру мен қолдануды талқылады. 2026 жылдың 5 қарашасы жағдайы бойынша «АБанк» 115 компаниямен қарым-қатынасын тоқтатты, шамамен 37 ұйым мониторингте. «Элдик Банк» 169 компанияға қызмет көрсетуді тоқтатты, тағы төрт компания тексеруде. Үкіметтің мәлімдеуінше, санкциялық тәуекелдің жоғарылығы ұйымның заңды бұзғанын немесе халықаралық санкциялар тізіміне енгенін білдірмейді.

Отырыста Еуропалық Одақ, АҚШ және Ұлыбритания сияқты халықаралық серіктестермен өзара іс-қимыл мәселелері де қаралды. Сыдықов санкциялық тәуекелдерді уақытылы анықтау және азайту үшін мемлекеттік органдардың, қаржы реттеушілерінің және банктердің бірлескен жұмысын жалғастыру қажеттігін атап өтті.