Ozarbayjonda sartaroshxona va goʻzallik salonlariga soliq imtiyozi joriy etiladi

Ozarbayjonda sartaroshxonalar, goʻzallik salonlari va kosmetologiya markazlarining faoliyati bilan bogʻliq soliqqa tortish qoidalari oʻzgartirilmoqda. Modern.az xabar berishicha, bu Soliq kodeksiga taklif qilingan oʻzgarishlarda nazarda tutilgan.

Loyihaga koʻra, 2027-yil 1-yanvardan boshlab besh yil muddatga sartaroshxonalar, goʻzallik salonlari va kosmetologiya markazlari uchun soddalashtirilgan soliq boʻyicha yangi imkoniyat yaratiladi. Ketma-ket 12 oylik davrda soliqqa tortiladigan operatsiyalar hajmi 200 ming manatdan oshsa ham, tadbirkorlar soddalashtirilgan soliq toʻlovchisi boʻlish huquqidan foydalana oladi. Ushbu faoliyat turlaridan olinadigan daromadlar boʻyicha soddalashtirilgan soliq stavkasi 8 foiz boʻladi.

Shuningdek, aholiga koʻrsatilgan xizmatlar uchun POS-terminal orqali naqd pulsiz toʻlovlardan shakllangan daromadlarga 6 foizlik soliq stavkasi qoʻllanadi. Ushbu imtiyoz ham 2027-yil 1-yanvardan besh yil muddatga amal qiladi. Naqd pulsiz toʻlovlarni shu tartibda soliqqa tortish uchun POS-terminal nazorat-kassa apparatiga yagona operatsion tizimda integratsiya qilinishi talab etiladi.