Әзірбайжанда шаштараздар мен сұлулық салондарына салық жеңілдігі енгізілмек

Әзірбайжанда шаштараздардың, сұлулық салондарының және косметологиялық орталықтардың қызметіне байланысты салық салу ережелері өзгертіледі. Modern.az хабарлауынша, бұл Салық кодексіне ұсынылған өзгерістерде көзделген.

Жобаға сәйкес, 2027 жылғы 1 қаңтардан бастап бес жыл мерзімге шаштараздар, сұлулық салондары және косметологиялық орталықтар үшін жеңілдетілген салық бойынша жаңа мүмкіндік жасалады. Үздіксіз 12 айлық кезеңде салық салынатын операциялардың көлемі 200 мың манатты асса да, кәсіпкерлер жеңілдетілген салық төлеушісі болу құқығын пайдалана алады. Осы қызмет түрлерінен түсетін кірістер бойынша жеңілдетілген салық мөлшерлемесі 8 пайыз болады.

Сонымен бірге халыққа көрсетілетін қызметтер үшін POS-терминал арқылы қолма-қол ақшасыз төлемдерден қалыптасқан кірістерге 6 пайыздық салық мөлшерлемесі қолданылады. Бұл жеңілдік те 2027 жылғы 1 қаңтардан бастап бес жыл мерзімге күшінде болады. Қолма-қол ақшасыз төлемдерді осы тәртіппен салыққа тарту үшін POS-терминал бақылау-касса аппаратымен бірыңғай операциялық жүйеде интеграциялануы талап етіледі.