Azərbaycanda bərbər və gözəllik salonlarına vergi güzəşti tətbiq ediləcək

Azərbaycanda bərbərxanaların, gözəllik salonlarının və kosmetoloji mərkəzlərin fəaliyyəti ilə bağlı vergitutma qaydaları dəyişdirilir. Modern.az xəbər verir ki, bu, Vergi Məcəlləsinə təklif olunan dəyişikliklərdə nəzərdə tutulub.

Layihəyə əsasən, 2027-ci il yanvarın 1-dən beş il müddətinə bərbərxanalar, gözəllik salonları və kosmetoloji mərkəzlərə sadələşdirilmiş vergi üzrə yeni imkan yaradılacaq. Ardıcıl 12 aylıq dövrdə vergi tutulan əməliyyatların həcmi 200 min manatı keçsə də, sahibkarlar sadələşdirilmiş vergi ödəyicisi olmaq hüququndan istifadə edə biləcəklər. Bu fəaliyyətlərdən əldə edilən gəlirlər üzrə sadələşdirilmiş verginin dərəcəsi 8 faiz olacaq.

Əhaliyə göstərilən xidmətlərə görə POS-terminal vasitəsilə nağdsız ödənişlərdən formalaşan gəlirlərə 6 faizlik vergi dərəcəsi tətbiq ediləcək. Həmin güzəşt də 2027-ci il yanvarın 1-dən beş il müddətinə qüvvədə olacaq. Nağdsız ödənişlərin bu qayda ilə vergiyə cəlb edilməsi üçün POS-terminalın nəzarət-kassa aparatına vahid əməliyyat sistemində inteqrasiya edilməsi tələb olunacaq.