Shavkat Mirziyoyev Bokuda Qatar amiri bilan uchrashdi

Prezident Shavkat Mirziyoyev Bokuda Osiyoda hamkorlik va ishonch choralari boʻyicha kengash sammiti doirasida Qatar amiri Shayx Tamim bin Hamad Ol Soniy bilan uchrashdi. Suhbat boshida Oʻzbekiston va Qatar oʻrtasidagi strategik sheriklik hamda koʻp qirrali amaliy hamkorlik izchil rivojlanayotgani mamnuniyat bilan qayd etildi.

Yetakchilar oliy darajadagi samarali muloqotlar tufayli soʻnggi yillarda oʻzaro aloqalar yangi sifat bosqichiga koʻtarilganini taʼkidladi. Hozirda Qatar kompaniyalari energetika, kimyo sanoati, oziq-ovqat xavfsizligi, transport va qurilish sohalarida faol ishlamoqda; joriy yil boshidan buyon investitsiyalar oʻzlashtirilishi sezilarli oshgan. Madaniy-gumanitar aloqalar ham jadal rivojlanib, xalqlarni yanada yaqinlashtirmoqda.

Uchrashuvda ikki tomonlama hamkorlikning istiqbolli yoʻnalishlari belgilandi. Dekabr oyida oʻtadigan Doha forumida Oʻzbekistondan nufuzli delegatsiya ishtirok etadi, tadbir doirasida Hukumatlararo qoʻshma komissiya va Ishbilarmonlar kengashi yigʻilishlari oʻtkazilishi rejalashtirilmoqda. Yetakchilar xalqaro va mintaqaviy ahamiyatga molik dolzarb masalalar yuzasidan ham fikr almashdilar.