Oʻzbekneftgaz Buxoro NQZ modernizatsiyasini Axens, Technip va CPECC bilan muhokama qildi

Oʻzbekneftgaz Buxoro neft qayta ishlash zavodini modernizatsiya qilishda ishtirok etish imkoniyati yuzasidan Fransiyaning Axens va Technip kompaniyalari hamda Xitoyning CPECC kompaniyasi bilan muzokaralar oʻtkazdi. Uchrashuvga Oʻzbekneftgaz AJ boshqaruv raisi Abdugani Sanginov rahbarlik qildi. Bu haqda kompaniyaning axborot xizmati xabar berdi.

Tomonlar zavodning yillik qayta ishlash quvvatini 2,5 million tonnadan 5 million tonnagacha oshirishni nazarda tutuvchi loyiha doirasida hamkorlik istiqbollarini muhokama qildi. Kengaytirish konsepsiyasini ishlab chiqish, texnologik yechimlar va litsenziarlarni tanlash, asosiy muhandislik loyihasini tayyorlash, uskunalarni yetkazib berish, qurilish va loyihani boshqarish koʻrib chiqildi.

Sanginov loyihani amalga oshirishda vaqt omili hal qiluvchi ahamiyatga ega ekanini taʼkidlab, har bir kompaniyadan bir hafta ichida dastlabki texnik-tijoriy takliflarni taqdim etishni soʻradi. Muzokaralar Prezidentning 3-noyabrda Buxoro zavodiga tashrifi chogʻida berilgan topshiriq ijrosi doirasida olib borilmoqda. Topshiriqda quvvatni ikki barobar oshirish va yetakchi xalqaro kompaniyalarni jalb etish vazifasi qoʻyilgan. Axens, Technip va CPECC ning loyihadagi ishtirokining aniq shartlari hali belgilanmagan.