Oʻzbekiston Prezidenti Bakuga ish tashrifini yakunladi

Oʻzbekiston Respublikasi Prezidenti Shavkat Mirziyoyevning Ozarbayjon Respublikasiga ish tashrifi yakunlandi. Tashrifning birinchi kuni davlatimiz rahbari Ozarbayjon Prezidenti Ilham Aliyev bilan uchrashdi. Rahbarlar yuqori darajada erishilgan kelishuvlarning amalga oshirilishini hamda strategik sheriklik va ittifoqchilik munosabatlarini yanada rivojlantirish masalalarini muhokama qildi.

15-oktabr kuni Oʻzbekiston Prezidenti Bakuda boʻlib oʻtgan Osiyoda oʻzaro hamkorlik va ishonch choralari boʻyicha sammitning yettinchi yigʻilishida ishtirok etdi. Davlat rahbari Osiyoda ishonch infratuzilmasini shakllantirish kontseptsiyasini ishlab chiqishni taklif qildi, Osiyo texnologik ishonch tashabbusi va sunʼiy intellektdan masʼuliyatli foydalanish tashabbusini ilgari surdi hamda iqlim barqarorligi sohasida hamkorlikni yoʻlga qoʻyishga chaqirdi.

Sammit doirasida Qatar Amiri Shayx Tamim bin Hamad Al Sani, Laos Xalq-demokratik Respublikasi Prezidenti Thongloun Sisoulith, Kambodja Bosh vaziri Xun Manet hamda Vyetnam Sotsialistik Respublikasi vitse-prezidenti Vo Thi Anh Suan bilan alohida uchrashuvlar oʻtkazildi. Shuningdek, boshqa delegatsiyalar rahbarlari bilan suhbatlar boʻlib oʻtdi. Tashrif yakunida Geydar Aliyev nomidagi xalqaro aeroportda yuqori darajadagi mehmonni Ozarbayjon Bosh vazirining oʻrinbosari Shahin Mustafayev va boshqa rasmiylar kuzatib qoʻydi. Davlatimiz rahbari Toshkentga joʻnab ketdi.