Serik Jumangʻarin Qozogʻiston iqtisodiyoti uchun uchta stsenariy taqdim etdi

Qozogʻiston hukumati 2027-yilda mamlakat iqtisodiyotini rivojlantirishning uchta stsenariysini tayyorladi. Neft narxlariga qarab YaIM oʻsishi 3,2% dan 5,9% gacha boʻlishi kutilmoqda. Milliy iqtisodiyot vaziri Serik Jumangʻarin Qurultoy yigʻilishida 2027–2029-yillarga moʻljallangan ijtimoiy-iqtisodiy rivojlanish prognozini taqdim etdi. Hukumat Qozogʻistonning asosiy savdo hamkorlarida oʻsish sekinlashishi kutilayotganini qayd etdi. Xalqaro tashkilotlar esa 2027-yil uchun neft narxi prognozini bir barrel uchun 70,3 dollargacha pasaytirdi.

Optimistik stsenariyda neft bir barrel uchun 85 dollar, oʻrtacha oʻsish 5,9% deb belgilangan. Asosiy stsenariyda barrel narxi 70 dollar, oʻsish 5% dan yuqori; pessimistik stsenariyda esa barrel narxi 50 dollar va oʻrtacha oʻsish 3,2% deb prognoz qilingan. Asosiy stsenariy boʻyicha nominal YaIM 2027-yildagi 199,3 trillion tengedan 2029-yilda 245 trillion tengegacha oshishi kutilmoqda.

Vazirlikka koʻra, qayta ishlash sanoatining oʻsish surʼati kon sanoatidan oshib ketadi; qishloq xoʻjaligida yillik oʻrtacha oʻsish kamida 5% boʻladi, qurilishda esa oʻsish 2027-yildagi 16% dan 2029-yilda 17,3% gacha koʻtariladi. Jumangʻarin avvalroq iqtisodiy oʻsishni cheklaydigan uchta asosiy omil sifatida neft qazib olishning kamayishi, milliy valyutaning mustahkamlanishi va isteʼmol kreditlarining sekinlashuvini koʻrsatgan edi.