Oʻzbekistonda 9 oyda gaz va elektrdan noqonuniy foydalanish 825 mlrd soʻm zarar yetkazdi

Vazirlar Mahkamasi huzuridagi Elektr energiyasi, neft mahsulotlari va gazdan foydalanishni nazorat qilish inspeksiyasi (Oʻzenergoinspeksiya) 2026 yilning 9 oyi davomida energiya resurslaridan noqonuniy foydalanish va qoidalarni buzish bilan bogʻliq 2795 ta holat aniqlanganini xabar berdi. Noqonuniy ravishda 129,1 mln kub metr tabiiy gaz va 226,4 mln kVt/soat elektr energiyasidan foydalanish natijasida davlat manfaatlariga jami 825,3 mlrd soʻm zarar yetkazilgan. Qoidalarni buzgan 4196 ta isteʼmolchiga nisbatan maʼmuriy bayonnoma rasmiylashtirilgan.

Neft mahsulotlari sifati ustidan nazorat tadbirlarida yoqilgʻi quyish shoxobchalari va korxonalardan olingan namunalarning 308 ta holatida 7435 tonna neft mahsuloti sifatsiz ekani aniqlangan. Ularning sotuvga chiqarilishi oldi olingan. Shuningdek, 9168 ta obyektning elektr taʼminoti loyihalari ekspertizadan oʻtkazilgan, 5674 ta isteʼmolchining elektr qurilmalari texnik koʻrikdan oʻtkazilgan.

Inspeksiya 199 ta tadbirkorlik subyektiga elektr energiyasi uchun 3,632 mlrd soʻm va tabiiy gaz uchun 12,084 mlrd soʻm ortiqcha hisoblangan summani qayta hisob-kitob qilgan. Isteʼmolchilarni elektr va gaz tarmoqlariga oʻzboshimchalik bilan ulanmaslikka chaqirgan. Yangi qonunga koʻra jarimalar oshirilgan, takroran sodir etilsa jinoiy javobgarlik qoʻllanadi.