Energetikaga investitsiyada ustuvor yoʻnalish — tarmoqdagi yoʻqotishlarni kamaytirish boʻladi, — prezident

Prezident Shavkat Mirziyoyev yoqilgʻi-energetika sohasidagi investorlar bilan ochiq muloqot olib bormoqda. Matbuot kotibi Sherzod Asadov buni xabar qildi.

Davlat rahbari sohaning soʻnggi oʻn yilda xususiy sarmoyalar va davlat-xususiy sheriklik tufayli rivojlanganini taʼkidladi. 2016-yildan beri energetika sohasiga 35 milliard dollar investitsiya kelib tushgan, hamkor davlatlar soni esa 10 tadan oshgan. Quyosh, shamol va gidroelektr stansiyalarining umumiy quvvati 11,1 GVt ga yetgan, tiklanuvchi energiya manbalari umumiy generatsiyaning 31 foizini tashkil etadi.

Olti yirik loyiha boʻyicha umumiy qiymati 4,7 milliard dollar boʻlgan kelishuvlar imzolangan; ular 3 GVt generatsiya va 400 MVt akkumulyator quvvatini nazarda tutadi. Mirziyoyev yangi quvvatlarni ishga tushirish bilan birga, elektr taʼminotini yaxshilash va tarmoqdagi yoʻqotishlarni kamaytirish ustuvor vazifa boʻlishini aytdi. 2030-yilgacha 22 ming MVt yangi quvvat yaratish maqsad qilingan; bu yillik generatsiyani 129 milliard kVt·soatga yetkazadi, uning 54 foizini «yashil» manbalar taʼminlaydi.