Oʻzbekistonda 2030-yilgacha 5 ming km elektr tarmogʻi va 16 ta yirik podstansiya quriladi

Prezident Shavkat Mirziyoyev yoqilgʻi-energetika sohasidagi investorlar bilan ochiq muloqot oʻtkazmoqda. Bu haqda prezident matbuot xizmati xabar berdi. Prezident yangi stansiyalar bilan birga elektrni isteʼmolchiga yetkazib beradigan tarmoqlarni ham rivojlantirish zarurligini taʼkidladi. Generatsiya, uzatish va energiya saqlash tizimlari oʻzaro bogʻliq holda ishlashi kerak.

Hozir Fargʻona, Andijon va Namanganda talabning bir qismi boshqa hududlarda ishlab chiqarilgan elektr hisobidan qoplanmoqda. Yangi sanoat zonalari va yirik korxonalarning ishga tushishi yuklamani yana-da oshiradi. Sunʼiy intellekt va data-markazlar elektrga talabi tez oʻsayotgan yoʻnalishlardan. Har bir yirik data-markazda asosiy va zaxira elektr taʼminoti, energiya saqlash hamda sovitish tizimlari birgalikda rejalashtiriladi.

Soʻnggi besh yilda elektr tarmoqlarini modernizatsiya qilishga 2 milliard dollardan ziyod mablagʻ yoʻnaltirildi. 2030-yilgacha 5 ming kilometr tarmoq va 16 ta yirik podstansiya qurish, energiya saqlash quvvatini 4,5 GVtga yetkazish rejalashtirilgan. Loyihalarning katta qismi Qoraqalpogʻiston, Buxoro, Jizzax, Samarqand, Namangan, Qashqadaryo va Toshkent viloyatlariga toʻgʻri keladi. Ozarbayjon va Qozogʻiston bilan Kaspiy orqali yashil energiyani Yevropaga yetkazish loyihasi amaliy bosqichga oʻtmoqda.